Danmarkimi efterskolini atuartut amerlanerusut
Ukiumi atuarfiusumi 2017/18-imi Kalaallit Nunaanni Danmarkimiluunniit efterskolini atuartut aallartitsisimasut 451-iusimapput, tamanna ukiup siulianut sanilliullugu 14-inik amerleriarneruvoq. Kalaallit Nunaanni efterskolini aallartittartut amerlassusaat ikileriarsimasoq Danmarkimi aallartittartut amerleriarsimapput.
Titartagaq 1. 2010/11-miit 2017/18-imut efterskolernerit aallartinneqartut amerlassusaat, atuarfik malillugu
Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNESF).
Efterskole Villads Villadsen-i atuartunut 80-inut inissaateqartoq Maniitsumi Efterskoli atuartunut 70-inut inissaateqarpoq. Atuartulli efterskolini aallartittut amerlassusaat inissaqartitsinermit amerlanerusinnaapput, unitsitsisoqartillugu atuartut nutaat aallartissinnaasarmata.
2017/18-imi Kalaallit Nunaanni efterskolernerit aallartinneqartut amerlassusaat ikileriarsimapput. Pingaartumik Efterskole Villads Villadsen-imi, tassani 2017/18-imi aallartittut, ukiup siualiani 88-inut sanilliullugit, 77-iusimammata. Taamaasilluni 2017/18-imi Efterskole Villads Villadsen-imi atuartut amerlassusaat inissaateqarnermiit ikinnerusimapput.
2017/18-imi qallunaat efterskoliini atuartut ukiumut siulianut sanilliullugit 28-nik amerleriarsimapput. Ukiumi atuarfiusumi 2017/18-imi Namminersorlutik Oqartussat ilaqutariinnut isertitakitsunut angajoqqaat akiliutigisartagaannut tapiissutinik qaffaanerat ilutigalugu amerleriarput.
Efterskolernermik aallartitsisut amerlasuut inuusunnerusut
Amerlanerpaat ukiumi 16-inik ukioqalerfimminni efterskolernermik aallartitsisarput, amerlasuullu meeqqat atuarfianni naammasserlaajusarlutik. Ukiumi atuarfiusumi 2017/18-imi atualertut 78 procentii ukiumi 16-iliiffimminni aallartissimasut 8 procentit inuusunnerupput. Taamaallaat Danmarkimi inuusuttut 16-it inorlugit ukiullit efterskolernermik aallartitsisinnaapput.
16-inik ukioqalereersimallutik efterskolernermik aallartitsisartut amerlassusaat 2016/17-imi 20 procentinik appariarsimasoq 2017/18-imi 16 procentinik appariarsimavoq. Killormulli 16-imik ukiullit 16-illu inorlugit ukiullit amerlassusaat 2 procentinik qaffariarsimavoq.
Titartagaq 2. 2017/18-imi efterskolernerit aallartinneqartut, ukiut malillugit
Nalunaarut: Ukiup pineqartup naanerani atuartut ukiui malillugit naatsorsuisoqarpoq.
Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNESA).
Efterskolernerit sisamaagaangata pingasut naammassineqartarput
Ukiumi atuarfiusumi 2017/18-imi atuartut 352-it, aallartittut 78 procentiisa, efterskolernitik naammassisimavaat. Ukiup siulianut sanilliullugu 2 procentinik siuariarneruvoq.
Efterskolit akornanni Efterskole Villads Villadsen-imi naammassinnittarnermut procenti appasinnerpaavoq. 2017/18-imi Efterskole Villads Villadsen-imi atuartut 58 procentii naammassinnissimapput. Atuarfiup aallartisarneqarneraniilli naammassinnittarnermut procenti appariartuaarusaarsimavoq, 2016/17-imilu 55 procentimiilluni appasinnerpaasimalluni.
Maniitsumi Efterskoli-mi atuartut 73 procentiisa efterskolernitik naammassisimavaat. 2013/14-imi Maniitsumi Efterskoli-mi naammassinnittarnermut procenti 48 procentimiilluni appasinnerpaasimavoq, naammassinnittarnermullu procenti taamanernit 26 procentinik qaffassimavoq.
Kalaallit Nunaanni efterskolinut sanilliullugit qallunaat efterskolii qaffasinnerusumik naammassinnittarnermut procenteqarsimapput. Ukiulli ingerlanerini appariarsimavoq, naammassinnittarneq 2013/14-imi 91 procentimiittoq ukiuni atuarfiusuni kingullerni missiliorlugu 84 procentinngorsimavoq.
Titartagaq 3. 2010/11-miit 2017/18-imut naammassinnittarnermut procenti, efterskolit malillugit
Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNESF).
Ukioqatigiinni pingasunit amerlanerusut efterskolernermik aallartitsisarput
Ataani takuneqarsinnaapput 1995-imiit 2000-imut ukioqatigiit ukiuni atuarfiusuni 2009/10-mi aammalu 2017/18-imi efterskolernernik aallartitsisimasut naammassinnissimasullu.
Titartagaq 4. Ukioqatigiinni efterskolernermik aallartitsisimasut/naammassinnissimasut amerlassusaat, 1995-imiit 2000-imut inunngortut malillugit
Najoqqutaq: Naatsorsueqqissaartarfik- kisitsisaataasivimmi kisitsisit takukkit (http://bank.stat.gl/UDNESE).
Inuusuttut 2000-imi inunngorsimasut affangajai (47 procentit) efterskolernermik aallartitsisimapput, 35 procentillu efterskolernermik naammassinnissimallutik. Siuliini ukioqatigiit marluk amerlaqatigaat. Ukioqatigiinni inuit amerlassusaat 1995-imi 941-nit 2000-imi 803-nut ikileriarsimapput.